hubei 发表于 2018-8-18 17:56:20

笑到最後:建議派股票挽民心


                                                                                                     


                                      行政長官林鄭月娥正就施政報告作諮詢,本欄認為,要重建港人信心,就係將政府持有嘅75.19%港鐵(066)股份全數派畀香港人。
根據港鐵2017年年報,代表政府嘅財政司司長法團持有4,517,196,134股或75.19%。參考2011年派錢6,000元計劃,當年估計合資格人數約610萬人,平分每名香港人大約可得740股港鐵,以上周五收市價42.6元計,相當於每名香港人獲得價值31,524元的股票。
香港人值得驕傲嘅事已經買少見少。近年嚟治港精英一面倒指摘香港人,搬出其他鄰近地區嘅經濟表現,以貶低香港人。不過,過去廿年,最直接反映治港精英表現跑輸鄰近地區政府指標有兩個:一、澳門政府派錢;二、新加坡政府派樓。喺呢兩方面,香港政府完全交白卷,治港精英自己都冇乜功績,仲好意思走出嚟鬧香港人,亦都係香港民怨嘅主因。
治港精英最大無能係:本來香港人係唔需要羡慕其他地區派乜派物,因為我哋自己識賺返嚟,不過發達嘅途徑已被逐一封阻。
炒股票同炒樓本來係香港快錢來源之一。先講股市,自從港股滲入太多中資股後,已變成橫行上落走勢。發展唔到好似美股咁長升長有嘅局面,惟有食老本炒樓。
以前樓市買樓借錢容易,最低消費甚至放低幾皮嘢已可以參與摸貨,但辣招挾高樓價,加上收緊按揭令門檻大幅提高,上到車已好僥倖,靠買樓向上流門路已被封。
香港人發達無望,食老本又冇份,政府應打破呢個困局,至低限度可分享港鐵帶嚟嘅經濟成果,亦令港人喺澳門人同新加坡人面前有番份自豪。如果施政報告真係想有「施政新思維」,應該派股票,提升廣大市民成為資產階級,重建香港人對特區政府嘅信心。

高明

http://fb.com/bigricetea
本欄逢周一刊出                                    
                                                                               
                                                                  

                           
页: [1]
查看完整版本: 笑到最後:建議派股票挽民心